Sony Nex-6 我的使用心得

_MG_1720

 

消失一段日子,仲未得閒出返篇想寫好耐嘅教學,寫住其他嘢先,希望都啱大家胃口。。。過多排先出教學。。。

 

話說小弟主力用7D,擁有左佢三年,基本上只要想影相都會帶住,由以前一機一鏡,到次次一帶相機就等於一機兩鏡,有時仲加埋閃,的確係會拎到傻,而屋企以前部DC又真係已經太落後,屋企想影相又唔敢、唔識用部7D,於是我年頭就二手入左部主打輕便嘅Sony Nex-5做家庭機,或者係我備用機。

 

好衰唔衰我又玩埋手動鏡,舊鏡配EOS 同 Nex 都真係絕配!用得好開心,主力仍然係7D,玩舊鏡就會拎埋Nex,方便好多!同期,入左支Sigma 10-20/3.5 比7D用之後,一直都冷落左支EF-S 15-85,最近終於比我賣左佢,把心一橫,賣埋部Nex-5,升做Nex-6!!

 
作為Nex系列最新成員,Nex-6有咩咁吸引我?主要都係個EVF,用ISO Hotshoe,玩左幾日之後有少少心得,或者感受啦,襯部機仲係城中熱話,同大家分享下!!

 

(一)大小適中,方便隨身

 

_MG_1688

 

當然買得Nex系列都係想要佢小小機身可以得到比較好嘅質素,Nex-6在呢方面的確冇令人失望,雖然Nex-6比Nex-5,Nex-3系列都大部左少少,但亦比Nex-7細部,拎上手我覺得不算大部,而配上新Kit SEL 16-50 PZ,比以往用Nex-5加Kit更方便拎黎拎去,其實自從 Panasonic 出左全球第一支電動Zoom餅,我一直都想Canon幫EOS出返支,咁當然到而家都未有,所以我就投向左Nex嘅懷抱。雖然唔係合金機身心入面總會唔夠爽,但更輕機身就令Nex-6 + Kit成為一個更好嘅隨身組合!

 

(二)快門反應有DSLR感覺

 

當年由 DC 上 DSLR,最爽就係快門遲滯細左好多好多,加上DSLR對焦快,由快門未按到完全按下,影到張相嘅時間係少左好多,Nex-5黎講,快門反應我都仲係覺得比較慢,黎到今時今日Nex-6快門反應已經好左好多,我唔敢講同DSLR一樣,但已經去到一個唔會令我等到燥嘅程度,感覺良好。

 

(三)新Kit方便,質素唔掂

 
_MG_1704

 

正如上面所講,新Kit真係好方便,細細支咁,在AF時,變焦搖干同變/對焦環分別係慢/快速嘅變焦,交替使用,後者粗調,前者微調,用上手唔會慢過用傳統鏡,可能要花少少時間適應下變形,但我自己用就覺得都易上手 。

 

NEX61PZ16-50/3.5-5.6 @ 16mm 所有修正全關

 

但新鏡缺點都唔少,質素強差人意,同上代嘅18-55一樣反差太大影出黎暗位完全冇細節,色彩方面,淡淡灰灰,不太討好,有師兄形容為"數碼味",感覺會似十年前初代數碼相機的色彩,仲有,支鏡在Wide End嘅暗角同變形都幾過份,雖然相機內置左自動修正,但影Raw就麻煩啲,因為呢啲修正完全Apply唔到落去Raw,要入左電動自己再調整返。

 

NEX6

(上)無修正   (下)LR修正後

 

(四)EVF亮麗,方便,Sensor過敏

 

EVF係我選Nex-6而捨Nex-5/Nex-5R 的最大原因,使用時感覺良好,資料顯示Nex-6的EVF有236萬像素,A77的有240萬,但我感覺上Nex-6的EVF不及友人的A77流暢,但仍然屬於非常好用,十分流暢的程度!使用時,只要眼睛貼近EVF旁的Sensor,相機會自動切換使用EVF,但呢個Sensor比較敏感,有好幾次我將Nex-6放腰平以上翻螢幕取景,估計由於我件衫係黑色,個Sensor成日同我Switch左去用EVF,呢點有啲唔方便,如果部機可以知道個Mon反左出黎就識等自動Disable左個EVF Sensor,就體貼多了。

 

(五)ISO6400勉強可用,ISO100令人感動

 

DSC00034

 

PZ16-50 @ ISO3200

 

小弟用嘅7D出左名高ISO麻麻,ISO1600已經見頂,不過話晒都三年機齡,咁比有啲唔公平,但要比的話,Nex-6高ISO就真係表現唔錯,ISO3200絕對可以接受,ISO6400就少用為妙,可能因為高ISO好左,個Auto ISO好易就跳左上ISO3200。

 

另外Nex-5最低ISO係200,最快快門得1/4000,出戶外真係唔洗指意用個大少少嘅光圈,或者想個快門慢少少都難,而家Nex-6有返ISO100,影相彈性都大返啲,而低ISO理論上亦可以保留到更多細節。

 

(六)閃燈掣,錄影掣好難撳

 

呢兩個掣在機身設計上相對較凹陷,比較難撳得到,講得好聽就冇咁易誤觸,但老實講本身個掣嘅位置已經唔會咁易郁到,佢整到咁凹就真係麻煩多於體貼。

 

(七)雙轉盤、自定功能鍵,同時進步又退步

 

機頂多左個模式轉盤,轉Mode方便左好多,同時,如果用M Mode,光圈快門可以分開兩個轉盤,好左好多,但係用P,A,S Mode時雙轉盤就廢左武功,只可以用上轉盤改光圈或快門,而下轉盤並唔可以設定改ev值同改ISO。

 

多左個獨立Fn掣,呢個係進步,但好可惜用上手反而冇以前咁就手,而且,獨立左個Fn掣出黎,同時又取消左個自訂C鍵,事實上,唔係方便左好多。

 

點樣可以同時進步,又退?我諗物理定律都係用黎參考下架姐。其實,呢兩個問上其實都係硬體好,但韌體冇充分配合嘅問題,希望可以在Update 時解放一下部機嘅潛力!

 

(八)微笑快門,值得玩下

 

微笑快門在中高階機其實唔係第一次見,但在Nex-6 + Kit呢個新配搭下,我認為實用性高左,因為SEL 16-50 PZ最Wide時等效焦距係24mm,自拍時兩到四個人都剛剛應付到,用微笑快門自拍,可以一定程度地避免手按快門做成的震動,自己就冇咁易鬆郁濛!

 
但係,初部試用發現Nex-6嘅人面對焦做得麻麻,成日影唔清楚自己個樣!

 

(九)轉接舊鏡,手動對焦感覺更佳

 

_MG_1705

 
轉接舊鏡玩,係好多用家入手Nex系列嘅大因素,以往用Nex-5時,已經感覺良好,而家Nex-6有埋EVF,就更加方便用舊鏡,可以在EVF內局部放大慢慢對焦,順帶一提,MF輔助由以往嘅放大7/14倍,改左做放大4.6/9.2倍,放大倍數比以往合理,使用上更加方便。

 

(十)內閃不自然,通用熱靴玩燈者至愛

 

_MG_1696

 
內閃又係Nex-6賣點之一,但正如大部分中過階機一樣,呢部機個內閃係比較弱雞,雞到得GN6,主要都係應急,補少少光用,影過幾張用內閃補光我就覺得不太自然,應該都唔會點用。最大問題係,內閃出力加減有啲麻煩,閃光燈補償要入Quick navi menu改,算方便左,不過都係有少少浪費左個雙轉盤……如果可以直接好似以前咁個下轉盤可以EDIT多D野就好了。

 

另一個Nex-6閃光燈相關嘅賣點係,通用熱靴!呢個對於新手或者只係想要部家庭機嘅朋友可能冇乜用,大家亦唔知係乜,但對我呢啲乜都玩下,想飛下燈嘅人黎講就意義重大,有一個通用熱靴意味住市面九成以上嘅閃光燈你都可以放上去用,不過就只可以手動輸出,面一般引閃器當然都可以正常使用啦,有得玩燈,就可以玩多好多效果,但有一點要留意,就係Nex系列閃燈同步最快嘅快門只係1/160(大部分單反係1/250,可以高速同步嘅高階機,更可以有1/8000,但閃燈同引閃器都要相應配合。),即係話,用Nex,基本上玩唔到壓光,要戶外陽光猛烈時飛閃,效果亦唔好,但室內、夜晚用,就一定勝任。

 

(十一)充電又慢又麻煩,同時耗電太快

 
Nex系列,黎到6同5R,包裝盒內已經不再附有座充,要叉電只可以經火牛由USB用機身直接充電,就咁講好似好方便,實際上,要用機第叉電意味住部機一定要在電蘇附近,如果平時慣左叉Overnight嘅話,成晚部機就要揾地方安置,入唔到防潮櫃,仲要承受一個唔覺意Kick跌部機嘅風險,次次充電都膽戰心驚!

 
由0%-100%,粒電大概要叉四個鐘,叉住又唔用得,如果你係重度使用者,其實佢焗你買多粒電再買個叉座,貴唔係貴,但麻煩囉。用電量,可能因為多左個EVF嘅關係,我覺得用得快過Nex-5,所以有多粒電都幾緊要,相信有Touch Screen嘅5R都會係咁上下。

 

(十二)Menu反應慢,讀寫速度慢

 
Nex系列,由第一部嘅5,最高階嘅7,到到最新嘅6,Menu個反應真係慢,做所有入Menu嘅Setting都比較花時間,同我用開Canon嘅相機比,真係Nex輸晒,雖然話習慣左會好啲,但始終用得冇咁爽。

 
影完張相寫入咭又係冇進步,如果唔Review,次次影完張相如果想即刻睇,一按Play掣,佢會同你講"正在寫入中,無法操作",一般都要等兩秒左右先可以入去睇返張相,須知影相呢啲嘢,有時係爭分奪秒的,下下都要等,仲要只係影一張都要等,三年黎,呢兩點Nex都冇乜明顯進步,至少應該令我感覺流暢啲啦!

 

(十三)室外測光仍然略暗

 
以前用Nex-5,用A mode,我已經習慣左至少要ev+1先係正常亮度,講緊嘅係權衡式測光,黎到新機都仲係咁,不過影響不大嘅,+/-ev其實都係基本功,應該要識下。

 

(十四)WiFi Remote,未夠完善

 
用WiFi Remote影相係有用,不過玩味大於實用性,其一,係連埋部相機電話太花時間,慢,就好易搞到冇癮,其二,以我而家所測試,連左WiFi就只可以影Jpeg,相機入面都黎唔到張Raw,其三,Remote左之後,手機個版面太唔直覺化,得一個快門掣,冇得揀對焦點,+/-ev又要入Setting搞,又係搞得黎都冇癮。

 
我本身覺得呢個功能對我地小市民黎講最大用途係成大班人合照時,Set左腳架,在不求人 地情況下都可以藉住個手機Mon黎影到個個都見到頭,但實際用落,就最大缺點係慢,真係搞得黎都冇癮,變左做一個只係有好過冇嘅Function。

 

總結:

打完晒啲文字發現呢個簡評其實都好多字又好長,以上全部都係我個人用Nex-6幾日之後嘅感覺,不過有啲文字諗唔到圖配合,而我真係懶再影相,有啲嘢又冇提到,拍片未玩過,所以呢,都仲係簡評! 襯部機仲新鮮滾熱辣,出左先!

 

總括黎講,Nex-6貫徹左一直以黎Nex系列高性價比嘅優良傳統,如果已經有一部大機,Nex-6或者7都係一部好好嘅隨身機,但Nex-6就令你可以用一個更抵嘅價錢玩到晒大部分高階機先有得玩嘅嘢,ISO Hotshoes,EVF,雙轉盤都令人 好感動,但部機其實都有缺陷,上文都有講出左唔少問題,我認為大部分都係韌體同軟體嘅問題,希望可以好似當年Nex-5 咁可以 Update ,好好善用下部機嘅硬件!

 

如果只係想買你人生第一部相機,又睇中左Nex系列,我覺得可以考慮3系同5系,因為我覺得要善用Nex-6嘅好處,可能都係要玩下舊鏡轉接,本身又有幾支燈可以玩下飛燈,已有大機但想要部功能齊全啲嘅隨身機嘅人會更啱!