[攝影路線] 俯瞰深水埗

_MG_8882

 

深水埗,一個新舊集結嘅地方,大家都知道呢度有黃金、高登、鴨記、譚仔、維記,除左食野買野,黎影相多數都係影下鴨記地攤、街邊檔,或者一年唔知幾多度嘅電腦節,似乎好少影下風景相,今日同大家去影下深水埗夜景。

  

小弟家住深水埗,十幾年來,自問都幾熟深水埗嘅路,但係玩左相機都好幾年,都仲未正式影過下成個深水埗,剛剛尋晚天氣幾好,我又吉到時間出黎,就決定去影下深水埗嘅夜景!由深水埗港鐵D2出口出發,行廿分鐘左右就會到到一個小山嘅山頂,算係市區一個幾方便影下相嘅地方。

 


 

先講講今次去影相我帶左乜先:

 
Canon EOS 7D:我部愛機!
Sigma 30mm f1.4 DC EX:成晚用得最少,只係出發時沿路Snap下。
Sigma 10-20mm f3.5 DC EX:主力鏡頭,八成相都係用佢影,一支幾好嘅鏡。
Contax Planar 85mm f1.4:我手頭上最貴一支鏡,想用返多啲抵啲!
Carl Zeiss Jena Sonnar 135mm f3.5:用得第二少,不過上山影,有支長焦可以以防萬一。

電筒:夜晚上山比較黑,一開始上山就冇路燈,一定要帶支以防萬一。
腳架:要影夜景,想手持,就算有防震都太勉強,一定一定一定要帶!因為路唔係咁難行,帶支大少少嘅腳架都可以。
水:天時熱帶水就一定要架啦,因為唔知你會想影幾耐,帶定啦!
一個相機背囊,咁就出發。

 


 
點行去,下面我會比個地圖大家睇,成晚我影左大概兩個鐘來回山上同港鐵,如果大家第一次上去就可能預多一頭半個鐘安全啲。以下主要係相片分享,如果唔想睇,直接飛到最底睇地圖吧!

 

_MG_8786

 
上山有幾個位真係好暗,我都開左電筒,之後行到開揚啲嘅地方,就有月光同埋少少地面燈光見到,上到山頂平地,我同我部相機都比月光照左出黎了。

 
_MG_8799

 
先影影天空,市區始終都係市區,太大光害,好勉強叫影到幾粒星星。

 
_MG_8796

 
上面呢張其實影到晒北斗七星,唔知大家見唔見到?

 
_MG_8811

 
以下大部分相都係爆光5-10秒,光圈f8-11,ISO100-400色溫2500-3000K,大家可以參考一下。再影一影石硤尾同白田邨,好光!影呢張相個位比較出,有少少危險,大家要小心!

 
_MG_8839

 
長沙灣,少啲燈光,可能因為見得少馬路,冇乜街燈,遠遠見到果條應該係昂船洲大橋,有錯請指正。

 
_MG_8828

 
換支85mm,影下夜晚仍然好旺的欽洲街。

 
_MG_8863

 
睇下,本身可以睇到對面海架!比呢啲樓擋晒…

 
_MG_8882

 
月光和燈光之下,我十分喜愛的深水埗。

 
下面幾張相用左少少特別方法影,唔係PhotoShop黎架,幾特別,大家估唔估到係點影架呢?

 
_MG_8874

 
_MG_8909

 
_MG_8893

 


 
其實今次最主要係想同大家分享下呢個影相位置,可以影到深水埗、長沙灣、石硤尾,日景夜景一樣唔錯,不過影市區,夜晚多啲燈光係影得感覺開心啲!路線方面,我整個左Google Map,以後如果有咩推介,我都盡量用Google Map去話比大家知,等大家可以去影相方便啲,不過我本身影風景係行山多,其實攝影熱點希望大家都可以多多交流!

 

Google Map:2012/07/28 20:35 – 深水埗的後山

 
在較大的地圖上查看 2012/07/28 20:35 – 深水埗的後山

 


 

後記:

 
其實呢個位置仲可以行去其他地方影,不過日抖影會靚啲,下次再教大家行!如果大家想影下深水埗夜景,我真係好建議大家去下呢度!可以早少少出黎食個Lunch,先去JCCAC (編按:賽馬會創意藝術中心) 影下相,夜晚落返深水埗食個靚飯,先再上山都唔遲,咁就影成日喇!係咪好介紹呢?

 
(編按: 相片的確好靚,如果想借用請聯絡一下,請保護作者的努力成果。)