了解你的鏡頭!

IMG_0142

 
講到底攝影始終是依賴器材的,理論上,越好的鏡頭越容易拍出更好的照片,但這並不代表普通鏡頭無所作為,關鍵在於我們有沒有把手上的鏡頭發揮到淋漓盡致!要發揮鏡頭的小宇宙,大前題是要好好認識你的鏡頭!

 

事實上好一支鏡嘅資料,鏡身上面已經寫左八成,仲有少少資料睇說明書或者上網一搵就有,熟悉自己支鏡、加上本身慢慢累積嘅攝影知識,就會知道有乜野你用現有器材係影到、或者係仲需要啲咩鏡頭先可以影到想要嘅效果,要入新鏡都有更加充分嘅理由啦!哈哈!

 
下面我地就從幾個簡單方面認識一下你嘅鏡頭,我地會主要用Canon EF-S 18-55/3.5-5.6 IS II同埋Canon EF-S 15-85/3.5-5.6 IS USM做例子!

 


 

(一)焦距

 

如果係用開DC,一上單反最唔習慣應該係睇唔明個焦距,由以前主要睇幾多倍Zoom,到到而家要睇啲數字,好似18-55咁,代表乜野呢?

 
IMG_0144

 

簡單講,呢支鏡頭有55÷18=3倍變焦能力,而因為支鏡係APS-C專用,要計返佢個等效焦距,Canon EOS系統上,不論用EF定係EF-S鏡,因為APS-C片副大小關係,如果要放支鏡上600D、60D、7D等機身上使用,要將焦距乘返1.6先係佢個等效焦距(NIKON、SONY係乘1.5),咁支18-55就即係等於28.8-88,作為一支KIT鏡,呢個焦段都幾方便,好多廠家都係用18-55呢個焦段做一支平價KIT,可能同造鏡技術成熟都有關。

 

更準確就要睇埋視角,呢個資料就係睇說明書或者上網查先有喇,我上DCFEVER搵左比大家參考下,18-55的最大視角為75.20度,係最Wide時,即係18mm(等效28.8mm)時,鏡頭望到最闊的角度,下面有埋支15-85比大家比較下。要留意嘅係,如果將全幅機專用的鏡頭,如Canon EF鏡放左APS-C機身上使用,焦距都要作相應換算,而視角亦不會有說明書上面寫嘅咁闊,但透視、壓縮等效果就不會有變。

 

最後提一提,一般我地會叫等效50mm、視角為46度的鏡頭做標準鏡,因為呢個焦距、視角比較接近人眼平常的視角。

 

Desktop
資料來源:DCFever.com

 


 

(二)光圈

 

101CANON1-002

 

好多人玩相機玩鏡頭都想要個大光圈黎影啲前清後矇、前矇後清嘅效果,但點知鏡頭個光圈呢?其實最大光圈,鏡頭個名一般都比左你,Canon EF-S 18-55mm f/3.5-5.6 IS II,即係話支鏡最大光圈會係f/3.5-f/5.6。

 

點解會變?因為呢支變焦鏡只係入門鏡頭,當我們轉動(或推拉)鏡頭改變焦距時,會同時改變光學結構,如果要光圈保持不變,鏡身就要造得比較大、而且重(如CANON、NIKON的大三元,全段都可以保持f2.8。)最重要就係成本會高好多好多,所以大部分變焦鏡,特別係以輕便、高倍為賣點的鏡頭,一般光圈會比較細,同埋會喺變焦過程中變得更細。

 

有最大光圈,當然有最小光圈,但呢個係鏡身上面冇嘅資訊,想知道,除左睇說明書同上網,最方便當然係插支鏡上機,自己試試啦!最大光圈同最小光圈都會喺變焦過程中變得更細,有時如果想要更細嘅光圈,如要影發光體、日光日白想用慢快門等,可Zoom一下鏡頭,就可以較到更細嘅光圈喇!

 


 

(三)對焦距離

 

101CANON1-001

 
大家都知道花花Mode即係影近嘢、影微距,以前用DC時可以將部機放到好近影,有啲機直情有0cm微距!部機就黎掂到嘢都仲影得到。單反之後,平時出街影啲細物件就冇咁方便。每一支鏡頭都會有佢自己對可以對焦嘅範圍,基本上都會係由最近對焦距離去到無限遠,而鏡身就會用花花標示最近對焦距離。

 

貴少少嘅鏡,會造埋對焦尺,比你手動用時可以一直睇住對到幾遠,係好有用架!我上次去旅行,有一支鏡個AF跌壞左,我有幾日都係靠睇對焦尺+手動對焦黎影相。上圖下面見到支18-55最近對焦距離係0.25m/0.8ft,咁呢個對焦距離,係唔係同DC一樣由鏡頭計起呢?原來唔係架,我地睇睇下面張圖:

 

DSC05347

 
見到機身上部,閃光粒附近會有一粒魚蛋咁嘅記號,呢個就係機身入面CMOS嘅位置,所有對焦距離,都係由呢個平面計起的。

 

最近對焦距離越短,就會越方便使用,平時大家鍾意影下食物、影下小手作、模型都唔洗拎到部機好後好後先影到,考慮下一支心水鏡頭之時,不妨留意一下呢樣野!

 


 

(四)濾鏡口徑

 

101CANON1

 

濾鏡口徑大小,最主要當然係影響你要買嘅濾鏡大細啦,本身大家可能一鏡一UV/Protector,但係有啲濾鏡,好似CPL(環形偏光鏡)、IR(紅外線濾鏡)、ND(減光鏡)同埋其他好似漸變灰等等濾鏡,其實係可以共用,所以如果你要入手頭先講果幾種濾鏡黎玩,最好先先睇一睇你支鏡個口徑,如果你已經有幾支鏡又覺得幾支鏡都會用到的話,就最好買到最大口徑(如77mm/82mm)的濾鏡,再用接環去接返比口徑細啲(好似62mm/72mm)嘅鏡,抵過你買幾塊唔同大細,但同一功用嘅Filter。

 

另外,有啲鏡係落唔到Filter的,例如大部分魚眼鏡、某幾支Ultra Wide,會由於前鏡組凸出太多而唔可以以正常方法落Filter,冇錯,係保護鏡都用唔到,所以如果你係好怕支鏡有任何損傷又想入手呢啲廣角或者魚眼,建議你都係上網搵搵資料先再決定買唔買好了。

 


 

(五)接環(MOUNT)

 

DCIM

 
唔同Mount設計唔同,電子接點都唔同,意味住唔機身就一定要用返相應Mount嘅鏡頭,Canon有EF、EF-S、EF-M,EF-M的鏡只可以用在EOS-M,EF、EF-S都可以用在APS-C機身,同時可以透過專用轉接環用在EOS-M,FF機身就只可以用EF鏡。

 

其他廠家,NIKON有FX同DX分,相應返Canon嘅EF同EF-S,PENTAX用K-Mount,Sony有A-Mount(SLT)同E-Mount(NEX)、PAN記同OM都係用M43,兩者可以共用。

 

另外,唔少機身可以轉接玩幾十年前舊鏡,好似CONTAX/YASHICA,CARL ZEISS等等,不過就會冇左自動對焦。呢個又係玩影相另外一個世界,以後再分享。

 

知道用咩Mount有咩用?除左可以睇下自己部機可以用咩鏡,當然就係唔好買鏡時出事或者乜都唔知咁比人笑啦!

 


 

(六)防震

 
鏡頭有防震當然會令成本上升,但係有時光線不足、或者相手撙持影下夜景,有個防震真係好好多!

 

唔同廠家防震都有唔同名,Canon鏡頭嘅叫IS、NIKON有VR、SONY E-Mount 係用OSS、SIGMA就叫OS,PENTAX、SONY A-Mount就係用機身防震。一般黎講,鏡頭防震對於中距至遠攝防震有比較好嘅表現,機身防震就Wide啲效果好啲。

 

可以留意埋,防震技術都一直進步緊,Canon IS已經去到等四代,仲有Hydroid IS,對唔同方法嘅震動都可以作出修正。而機身防震方面,最近人氣最勁都係OM部OMD-EM5,可以有五個方向修正,拍片影相都方便好多!

 


 

後記:

 
打呢篇嘢過程有點崎嶇,原先諗好打微距,點知又撞唔到好天啱時間出去影啲啱用嘅相,好啦,轉Topic,影好晒相,開始打,打到一半就發現影漏相,算,再開壇影多次!好喇,點知打好左,唔知衰乜又冇晒,雖然唔係咩大作,但有血有淚 =.=